ກອງປະຊຸມສະຫຼຸບວຽກງານຂະບວນການແຂ່ງຂັນ 5 ເປັນ ເຈົ້າປະຈຳສົກປີ 2017-2018 ຂອງສະຫະພັນກຳມະບານເມືອງກາສີ

ໃນຕອນເຊົ້າຂອງວັນທີ 6 ພະຈິກ 2018 ຜ່ານມານີ້. ຢູ່ທີ່ສະໂມສອນຂອງເມືອງ ກາສີ ແຂວງວຽງຈັນໄດ້ຈັດກອງປະຊຸມສະຫຼຸບວຽກງານຂະບວນການແຂ່ງຂັນ 5 ເປັນເຈົ້າປະຈຳສົກປີ 2017-2018 ຂອງສະຫະພັນກຳມະບານເມືອງກາສີ ຂື້ນຢ່າງເປັນທາງການ.

ໂດຍການເປັນປະທານຂອງທ່ານ ຄຳໃບ ແກ້ວນະຄອນ ປະທານສະຫະພັນກຳມະບານ ເມືອງກາສີ. ໃຫ້ກຽດເຂົ້າຮ່ວມມີທ່ານ ຈັນສະໝອນ ຈັນທາທອນ ຮອງປະທານ ສະຫະພັນກຳມະບານ ແຂວງວຽງຈັນ ພ້ອມດ້ວຍຄະນະ, ມີທ່ານ ແພງຄຳ ຈັນທະມຸງຄຸນ ຄະນະປະຈຳພັກເມືອງ ປະທານກວດກາພັກ – ລັດເມືອງກາສີ, ມີບັນດາຄະນະບໍລິຫານງານສະຫະພັນກຳມະບານເມືອງ, ມີຫົວໜ້າໜ່ວຍຮາກຖານກຳມະບານທົ່ວເມືອງພ້ອມດ້ວຍພະນັກງານ ທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ທ່ານ ຄຳໃບ ແກ້ວນະຄອນ ປະທານສະຫະພັນກຳມະບານ ເມືອງກາສີ. ໄດ້ຂື້ນຜ່ານບົດສະຫຼຸບວຽກງານຂະບວນການແຂ່ງຂັນ 5 ເປັນເຈົ້າປະຈຳສົກປີ 2017-2018 ແລະ ທິດທາງແຜນການຈັດຕັ້ງປະຕິບັດຂໍ້ແຂ່ງຂະບວນການ 5 ເປັນ ເຈົ້າປີ 2019 ເຊີ່ງມັນສະແດງອອກຄື:

ສະຫະພັນກຳມະບານ ມີກຳມະບານຮາກຖານ 38 ຮາກຖານ, ມີໜ່ວຍກຳມະບານອ້ອມຂ້າງເມືອງ 6 ໜ່ວຍ ສາມາດຕີລາຄາປະເມີນຜົນການແຂ່ງຂັນ 5 ເປັນເຈົ້າໄດ້ດັ່ງນີ້:

– ເປັນເຈົ້າໂຄສະນາສຶກສາອົບຮົມການເມືອງ – ແນວຄິດ ປະຕິບັດໄດ້ 88,67%

– ເປັນເຈົ້າໃນການປັບປຸງແບບແຜນການນຳພາ ແລະ ຂະຫຍາຍການຈັດຕັ້ງກຳມະບານ ປະຕິບັດໄດ້ 87,98%

– ເປັນເຈົ້າປົກປ້ອງສິດ ແລະ ຜົນປະໂຫຍດອັນຊອບທຳຂອງພະນັກງານ, ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ປະຕິບັດໄດ້ 88,55%

– ເປັນເຈົ້າເຂົ້າຮ່ວມໃນການຕິດຕາມ, ກວດກາ, ຄຸ້ມຄອງລັດ, ຄຸ້ມຄອງເສດຖະກິດ, ວັດທະນະທຳ – ສັງຄົມ ປະຕິບັດໄດ້ 87,22%

– ເປັນເຈົ້າເຂົ້າຮ່ວມໃນການຈັດຕັ້ງປະຕິບັດແນວທາງນະໂຍບາຍການຕ່າງປະເທດຂອງພັກ ປະຕິບັດໄດ້ 86,32%.

ຜ່ານການຈັດຕັ້ງປະຕິບັດຂະບວນການແຂ່ງຂັນ 5 ເປັນເຈົ້າໃນໄລຍະຜ່ານມາສາມາດຕີລາຄາໄດ້ວ່າ: ຂະບວນການ 5 ເປັນ 5 ຂອງສະຫະພັນກຳມະບານລາວເປັນທ່າແຮງໜື່ງທີ່ສ້າງໃຫ້ພະນັກງານລັດຖະກອນ, ສະມາຊິກກຳມະບານ, ກຳມະກອນມີຄວາມກ້າວໜ້າກາຍເປັນແບບຢ່າງທີ່ດີໃຫ້ແກ່ມະຫາຊົນ, ສາມາດເປັນຜູ້ນຳທີດີສ້າງຄວາມໄວ້ເນື້ອເຊື່ອໃຈແກ່ການຈັດຕັ້ງ ແລະ ກາຍເປັນທ່າແຮງອັນສຳຄັນໃນການປົກປັກຮັກສາປະເທດຊາດ ຕາມແນວທາງນະໂຍບາຍຂອງພັກ, ປະຕິບັດຕາມ 4 ເນື້ອໃນ 4 ຄາດໝາຍ ແລະ 4 ບາດກ້າວບຸທະລຸຕາມມະຕິ IX, ມະຕິ X ຂອງພັກວາງອອກ

ຄຽງຄູ່ກັບດ້ານດີນີ້ກໍ່ຍັງມີດ້ານອ່ອນ ແລະ ຂໍ້ຄົງຄ້າງທີ່ຄະນະບໍລິຫານງານສະຫະພັນກຳມະບານເມືອງຈະຕ້ອງໄດ້ພ້ອມກັນຊອກຫາວິທີທາງແກ້ໄຂບາງບັນຫາໃນຕໍ່ໜ້າ.

ຫຼັງຈາກນັ້ນ ທ່ານ ສຸກສະຫວາດ ຈັນວັນເພັງ ຮອງປະທານສະຫະພັນກຳມະບານ ເມືອງກາສີ ກໍ່ໄດ້ໃຫ້ກຽດຂຶ້ນຜ່ານ ຂໍ້ຕົກລົງຂອງສະຫະພັນກຳມະບານແຂວງວຽງຈັນ ສະບັບເລກທີ 737/ສກບ.ຂຈ ລົງວັນທີ 30 ຕຸລາ 2018 ວ່າດ້ວຍ:

ການມອບໃບຢັ້ງຢືນ 5 ເປັນເຈົ້າໃຫ້ສະຫະພັນກຳມະບານເມືອງກາສີ ເຊີ່ງໃຫ້ກຽດຂຶ້ນມອບໂດຍ ທ່ານ ຈັນສະໝອນ ຈັນທາທອນ ຮອງປະທານ ສະຫະພັນກຳມະບານ ແຂວງວຽງຈັນ ແລະ ຂຶ້ນຮັບໂດຍທ່ານ ຄຳໃບ ແກ້ວນະຄອນ ປະທານສະຫະພັນກຳມະບານ ເມືອງກາສີ

ແລະ ຜ່ານຂໍ້ຕົກລົງຂອງປະທານສະຫະພັນກຳມະບານເມືອງກາສີ ສະບັບເລກທີ 234/ສບກ,ມສ ລົງວັນທີ 2 ພະຈິກ 2018 ວ່າດ້ວຍ:

ການມອບໃບຢັ້ງຢືນ 5 ເປັນເຈົ້າໃຫ້ຮາກຖານກຳມະບານ ແລະ ໜ່ວຍອ້ອມຂ້າງເມືອງທີ່ໄດ້ຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າປະຈຳສົກປີ 2017-2018 ຈຳນວນ 38 ຮາກຖານ ແລະ 6 ໜ່ວຍ ເຊີ່ງໃຫ້ກຽດຂຶ້ນມອບໂດຍທ່ານ ແພງຄຳ ຈັນທະມຸງຄຸນ ຄະນະປະຈຳພັກເມືອງ ປະທານກວດກາພັກ – ລັດເມືອງກາສີ ແລະ ຂຶ້ນຮັບໂດຍທ່ານຫົວໜ້າ ທັງ 38 ຮາກຖານ ແລະ 6 ໜ່ວຍ.

ໃນຕອນທ້າຍກອງປະຊຸມທ່ານ ຈັນສະໝອນ ຈັນທາທອນ ຮອງປະທານ ສະຫະພັນກຳມະບານ ແຂວງວຽງຈັນ ແລະ ທ່ານ ແພງຄຳ ຈັນທະມຸງຄຸນ ຄະນະປະຈຳພັກເມືອງ ປະທານກວດກາພັກ – ລັດເມືອງກາສີ ກໍ່ໄດ້ໃຫ້ກຽດຂຶ້ນມີຄຳເຫັນໂອ້ລົມ, ສະແດງຄວາມຍ້ອງຍໍຊົມເຊີຍຕໍ່ຄະນະຮາກຖານກຳມະບານທີ່ຍາດໄດ້ຜົນງານຫຼາຍດ້ານ ໃນໄລຍະຜ່ານມາ
ຂ່າວ: ເມືອງກາສີ.

Leave a Reply