ກອງປະຊຸມທາບທາມຢັ້ງຫາງສຽງຄະນະຊາວໜຸ່ມຮາກຖານກອງບັນຊາການ ປກສ ແຂວງ

ໃນວັນທີ 14 ພະຈິກ 2018 ຜ່ານມານີ້ ຫ້ອງການກອງບັນຊາການ ແລະ ຫ້ອງການເມືອງ ປກສ ແຂວງວຽງຈັນ ຈັດກອງປະຊຸມທາບທາມຢັ້ງຫາງສຽງ ຄະນະຊາວໜຸ່ມຮາກຖານກອງບັນຊາການ ປກສ ແຂວງຊຸດໃໝ່ ຂື້ນ ຢູ່ທີ່ສະໂມສອນກອງບັນຊາການ ປກສ ແຂວງ

ໂດຍການເປັນປະທານຂອງສະຫາຍ ພັຕ ກ່ຳ ດວງປັນຍາ ປະທານກວດກາຊາວໜຸ່ມຮາກຖານ ປກສ ແຂວງ, ມີຄະນະຮັບຜິດຊອບທາບທາມຢັ້ງຫາງສຽງພ້ອມດ້ວຍຊາວໜຸ່ມຫ້ອງການກອງບັນຊາການແລະຫ້ອງການເມືອງເຂົ້າຮ່ວມ.

ສະຫາຍ ພັຕ ກ່ຳ ດວງປັນຍາ ປະທານກວດກາຊາວໜຸ່ມຮາກຖານ ປກສ ແຂວງ ກ່າວວ່າ ການທາບທາມຢັ້ງຫາງສຽງ ຄະນະຊາວໜຸ່ມຮາກຖານກອງບັນຊາການ ປກສ ແຂວງ ໃນຄັ້ງນີ້ກໍ່ເພື່ອເຮັດໃຫ້ສະຫາຍສະມາຊິກຊາວໜຸ່ມຢູ່ແຕ່ລະຂັ້ນຂອງກອງບັນຊາການ ປກສ ແຂວງ ມີຄວາມຮັບຮູ້ເຂົ້າໃຈຢ່າງເລິກເຊິ່ງ, ເປັນເອກະພາບ ຕໍ່ກັບບັນດາມາດຖານເງື່ອນໄຂຜູ້ທີ່ຈະເລືອກເຂົ້າເປັນຄະນະຊາວໜຸ່ມຊຸດໃໝ່ທີ່ໄດ້ກຳນົດໃນການເຄືອນໄຫວຊີ້ນຳ – ນຳພາ ວຽກງານຮອບດ້ານຂອງກອງບັນຊາການ ປກສ ແຂວງ

ຊອກໃຫ້ເຫັນດ້ານຕັ້ງໜ້າ ແລະ ປະກົດການຫຍໍ້ທໍ້ ຂອງຊາວໜຸ່ມກຳລັງປ້ອງກັນຄວາມສະຫງົບ ເພື່ອມີວິທີສະກັດກັ້ນ ແລະ ແກ້ໄຂໃຫ້ທັນເວລາ

ການທາບທາມຢັ້ງຫາງສຽງ ຄະນະຊາວໜຸ່ມຮາກຖານ ເປັນການກະກຽມເປົ້າໝາຍໃນລັກສະນະເປີດກວ້າງ ເພື່ອມີແຫຼ່ງເລືອກເຟັ້ນຄະນະຊາວໜຸ່ມຮາກຖານກອງບັນຊາການເຂົ້າໃນຕຳແໜ່ງຕ່າງໆ ຢ່າງຖືກຕ້ອງຕາມຫຼັກການ ລວມສູນປະຊາທິປະໄຕ ເພື່ອຕອບສະໜອງທາງດ້ານຈຳນວນ, ຄຸນນະພາບ ແລະ ເພື່ອເປັນການກະກຽມດ້ານບຸກຄະລະກອນໃຫ້ແກ່ກອງປະຊຸມໃຫຍ່ຊາວໜຸ່ມ ທີ່ຈະໄຂຂື້ນໃນຕໍ່ໜ້ານີ້,

ສຳລັບເປົ້າໝາຍທີ່ຈະເປັນຄະນະຊາວໜຸ່ມຮາກຖານກອງບັນຊາການ ຕ້ອງມີມາດຖານສະເພາະຄື: ຕ້ອງມີຫຼັກໜັ້ນການເມືອງໜັກ ແໜ້ນ ຈົ່ງຮັກພັກດີຕໍ່ອຸດົມການສັງຄົມນິຍົມ, ມີຄວາມບໍລິສຸດຕໍ່ປະເທດຊາດ, ຕໍ່ປະຊາຊົນ ເປັນເອກະພາບຕໍ່ພາລະກິດປ່ຽນແປງໃໝ່, ຮູ້ຈໍາແນກໄດ້ມິດ – ສັດຕູຢ່າງຈະແຈ້ງ, ມີຄວາມສັດຊື່ຕໍ່ການຈັດຕັ້ງ, ຕໍ່ໝູ່ຄູ່ມີຄວາມສາມັກຄີຮັກແພງ, ມີຄວາມຈິງໃຈຕໍ່ກັນ

ມີແບບແຜນການດໍາລົງຊີວິດທີ່ປອດໃສ, ບໍ່ຟຸມເຟືອຍ, ມີຄວາມດຸໝັ່ນຮໍ່າຮຽນສະແຫວງຫາ, ມີຄວາມຮັບຮູ້ທາງດ້ານທິດສະດີການເມືອງ, ມີລະດັບວິຊາສະເພາະລະດັບໃດໜຶ່ງທີ່ແນ່ນອນ, ເຊິ່ງໄດ້ຜ່ານການທົດສອບໃນຕໍຳແໜ່ງນໍາພາ – ຄຸ້ມຄອງໃດໜຶ່ງມາກ່ອນ, ຮູ້ນຳພາເຕົ້າໂຮມຄວາມສາມັກຄີພາຍໃນ, ປຸກລະດົມຂົນຂວາຍມະຫາຊົນ,

ຕ້ອງເປັນຜູ້ເຊື່ອມຊືມກຳແໜ້ນທິດສະດີມາກ – ເລນິນ, ມີແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດເປັນຢ່າງດີ, ມີທັດສະນະຫຼັກໝັ້ນຊົນຊັ້ນກຳມະກອນ, ຄຸນທາດການເມືອງປະຕິວັດໜັກແໜ້ນ, ມີປະສົບການ ແລະ ຄວາມຊຳນານໃນການບໍລິຫານເປັນຢ່າງດີ, ຕ້ອງມີຄວາມສາມາດຜັນຂະຫຍາຍແນວທາງ, ແຜນນະໂຍບາຍຂອງພັກ ແລະ ລັດ ເຂົ້າໃສ່ວຽກງານທີ່ຕົນຮັບຜິດຊອບໄດ້ເປັນຢ່າງດີ,

ມີຄວາມຮູ້ ແລະ ເຂົ້າໃຈດ້ານວຽກງານວິຊາສະເພາະ, ທັງກຳແໜ້ນວຽກງານຊາວໜຸ່ມ ໂດຍສະເພາະແມ່ນລະບຽບຫຼັກການ, ຂໍ້ກຳນົດຕ່າງໆທີ່ພົວພັນເຖິງສະມາຊິກຊາວໜຸ່ມ, ເປັນຄົນເຂັ້ມງວດຕໍ່ລະບຽບຫຼັກການ, ມີແບບແຜນວິທີເຮັດວຽກທີ່ດີ ແລະ ກ້າວໜ້າ, ເປັນຜູ້ທີ່ມີສຸຂະພາບແຂງແຮງ, ສາມາດແບກຫາບໜ້າທີ່ວຽກງານ ທີ່ໄດ້ຮັບການມອບໝາຍ, ສະເພາະເປົ້າໝາຍທີ່ຈະເປັນຄະນະຊາວໜຸ່ມຊຸດໃໝ່ ຕ້ອງແມ່ນສະມາຊິກຊາວໜຸ່ມປະຊາຊົນປະຕິວັດລາວທີ່ມີອາຍຸຊາວໜຸ່ມແຕ່ 03 ປີຂື້ນໄປ.

ພາບ-ຂ່າວ: ປກສ ແຂວງວຽງຈັນ

Leave a Reply